Дизимнен өтиў Кириў
Сайтқа кириў
Качественные бесплатные шаблоны dle скачать с сайта



Быйыл ҳаял-қызлар ушын қосымша грантқа усыныснама алыў шәртлери қандай?

Быйыл ҳаял-қызлар ушын қосымша грантқа усыныснама алыў шәртлери қандай?
Мәҳәлле ҳәм шаңарақты қоллап-қуўатлаў министрлигиниң районлық (қалалық) бөлимлери жанындағы жумысшы топар тәрепинен талабан ҳаял-қызлардың ҳүжжетлери 24-июньнан 10-июльға шекем қабыл етилиўи жобаластырылған. Бул ҳаққында министрликтиң басқарма баслығы Д.Мирзажонова мәлим етти.

Усыныснамаға талабанлар тәрепинен төмендеги ҳүжжетлер усынылыўы керек:

- Мәҳәлле ҳәм шаңарақты қоллап-қуўатлаў министриниң атына арза;
- белгиленген критериялардан бирин тастыйықлайтуғын ҳүжжетлер (қосымшасы менен);
- мағлыўматнама-объективка;
- улыўма орта билимлендириў ямаса орта арнаўлы, кәсип-өнер билимлендириў мәкемесинен мағлыўматнама;
- паспорт ямаса туўылғаны ҳаққындағы гүўалықтың нусқалары.

Талабан ҳаял-қызлардың ҳүжжетлери толық көрип шығылғаннан соң, жумысшы топардың шешими тийкарында мәмлекетлик грант тийкарында оқыўға усыныс етилген ҳаял-қызлардың дизими – Жумысшы топардың жыйналыс протоколы тастыйықланады.

Оқыўға усыныс етилген ҳаял-қызлардың толық ҳүжжетлери (дизим, тийисли ҳүжжетлердиң нусқалары, Жумысшы топар баслығының жыйналыс протоколының түп нусқасы) Қарақалпақстан Республикасы Мәҳәлле ҳәм шаңарақты қоллап-қуўатлаў министрлигине усы жылдың 8-июль сәнесине шекем жибериледи.

Қарақалпақстан Республикасы Мәҳәлле ҳәм шаңарақты қоллап-қуўатлаў министрлиги тәрепинен усы ҳүжжетлер Ташкент қаласындағы министрликке усы жылдың 10-июль сәнесине шекем жибериледи.

2020-жыл 15-июльға шекем тийисли усыныснамалар ҳаял-қызларға бериледи.

2020-жыл 20-июльға шекем усыныснама берилген талабанлардың толық дизими Мәмлекетлик тест орайына усынылады.

Мағлыўмат орнында атап өтиў керек, Мәмлекетлик комиссияның 1-санлы протоколы тийкарында, 2020-2021-оқыў жылы ушын ҳаял-қызларға ажыратылған 4 процентлик қосымша мәмлекетлик гранты тийкарындағы қабыллаў көрсеткишлериниң аймақлар кесиминдеги бөлистирилиўи бойынша Қарақалпақстан Республикасы ушын улыўма 51 орын ажыратылған.

Ислам Матеков.

Сайтымыздың телеграмдағы каналына ағза болың: https://t.me/karinformuz

25-06-2020, 15:50
Көрилди: 429
Пикирлер: 0
Баспа ушын