Қарақалпақстанлы боксшы Россияда болып өткен халықаралық турнирде алтын медальды қолға киргизди

Россия Федерациясының Комсомольск қаласында бокс бойынша жаслар арасында Аўған урысы қурбанлары естелигине арналған халықаралық турнир болып өтти.

Халықаралық турнирге Россия, Аўғанстан, Молдова, Польша, Беларусь, Украина ҳәм Өзбекстаннан сайланды команда ағзалары қатнасты.

Жарыста +91 кг салмақ категориясында Қарақалпақстан Республикасынан болған Али Нуранов финалға шекем жетип барды. Финалда Россия Федерациясынан болған Даниил Даревшиков пенен жекпе-жекке шыққан жерлесимиз қарсыласына ҳеш қандай имканият қалдырмай, халықаралық турнирдиң жеңимпазы болды ҳәм алтын медаль менен сыйлықланды.

Мағлыўмат ушын, усы халықаралық турнирде Өзбекстан сайланды командасы 3 алтын, 1 гүмис ҳәм 2 бронза медалын қолға киргизди.

Ислам Матеков.

Сайтымыздың телеграмдағы каналына ағза болың: https://t.me/karinformuz