Дизимнен өтиў Кириў
Сайтқа кириў
Качественные бесплатные шаблоны dle скачать с сайта



Өзбекстанда тереклерди кесиўге мораторий 2024-жылға шекем узайтылады. Экополиция шөлкемлестириледи

Өзбекстанда тереклерди кесиўге мораторий 2024-жылға шекем узайтылады. Экополиция шөлкемлестириледи
Өзбекстанда тереклерди кесиўге мораторий 2024-жылға шекем узайтылады ҳәм жуўапкершилик кескин күшейтиледи. Бул ҳаққында Президент Шавкат Мирзиёев елимизде экологиялық жағдайды жақсылаў, тереклерди қорғаўды нәтийжели шөлкемлестириў ҳәм жасыл майданларды кеңейтиў илажлары бойынша видеоселектор жыйналысында атап өтти.

Мәлим болыўынша, өткен 6 айда мораторий дәўиринде 316 мың дана қымбат баҳалы тереклер сақлап қалынған. Бирақ, соған қарамастан, өткен дәўирде 2,8 мың қымбат баҳалы ҳәм 2 мыңнан аслам қунлылығы аз болған тереклер нызамға қайшы түрде кесилген.

Сонлықтан, Ташкент қаласы ҳәм ўәлаятлардың орайларында экологиялық полиция шөлкемлестириледи.

Оның жуўапкершилигине экология тараўындағы нызамбузыўшылықлар, атап айтқанда, тереклерди рухсатсыз кесиў, браконьерлик, нызамсыз шығындыларды таслаў сыяқлы жағдайларға қарсы профилактикалық ўазыйпалар жүкленеди.

Экологиялық полиция Ишки ислер системасында жумыс алып барады.

Соның менен бирге, экология тараўында қолланылатуғын жәриймалар муғдары 5 есе, жеткерилген зыян ушын компенсация муғдары 2 есе көбейтиледи.

- Барлық басшылар бир нәрсени анық еситип алсын, буннан былай бирде-бир «жасыл аймақ» ҳәм жәмийетлик паркте ҳәр қандай тереклерди кесиў қатаң түрде қадаған етиледи, - деди Президент Шавкат Мирзиёев.

Ислам Матеков,
Karinform.uz.


Сайтымыздың телеграмдағы каналына ағза болың: https://t.me/karinformuz

24-08-2021, 17:34
Көрилди: 246
Пикирлер: 0
Баспа ушын