Дизимнен өтиў Кириў
Сайтқа кириў
Качественные бесплатные шаблоны dle скачать с сайта



Әдиллик министрлиги Мәмлекетлик тест орайының өзгерислеринен наразы: Қандай кемшиликлер бар? Енди жағдай өзгере ме?


Әдиллик министрлиги Мәмлекетлик тест орайының тест режимине киргизиўди жобаластырып атырған өзгерислери бойынша өз жуўмақларын берди, деп жазады блогер Ш.Тўрахўжаева.
Онда жойбар бойынша бир неше усыныслар ҳәм наразылықлар билдирилген. Атап айтқанда:

- Министрлик Мәмлекетлик тест орайынан имтиханда пайдаланатуғын сабақлықлар мәселесине анықлық киргизиўди, яғный усы сабақлықлар дизимин қәлиплестириў ушын анық критерияларды ислеп шығыўды талап еткен.

- Жойбардағы ең тартыслы орынлардың бири – тест сынақларын қайтадан тапсырыў ушын ең кем мийнет ҳақының 1 есеси муғдарында төлем өндирилиўи мәселесине Әдиллик министрлиги наразылық билдирген. «Бул пуқаралардың конституциялық ҳуқықларына қайшы келеди, себеби конституцияда ҳәр кимге материаллық ҳәм физикалық мүмкиншиликлерине қарамастан, билим алыўы ушын бирдей имканият бериў белгилеп қойылған. Сол себепли усы бәнт қайта көрип шығылыўы керек, бул мәселениң халық арасында наразылықларды келтирип шығарыўы мүмкинлигин есапқа алыў керек», - деп жазылған министрлик жуўмағында.

- Мәмлекетлик тест орайы басшысының дәрежесин министрге теңлестириў бойынша бәнтке де наразылық билдирген. Мәмлекетлик тест орайы ўәкиллериниң кеңейтилиўи мақсетке муўапық емес, яғный усы қарар жойбарынан гөзленген мақсетке туўра келмейди. Әдиллик министрлиги «жойбардың тәртипке салыў проедмети болмаған 6-бәнт артықша сыпатында алып тасланыўы керек» дген жуўмаққа келген. Бул бәнтте Мәмлекетлик тест орайының ўәкиллерин кеңейтиў, соның ишинде, оның директорын лаўазымына қарай министрге теңлестириў, басшыға Мәмлекетлик тест орайы структурасына өзгерислер киргизиў ҳуқықын бериў нәзерде тутылған.

- Жойбарда 2 жыллық мүддетке әмел ететуғын сертификат берилиўи белгиленген. Бирақ, сертификат қандай тәртипте бериледи ҳәм берилгеннен кейин оның қандай юридикалық күши болады деген мәселелер ашық қалған. Әмелге асырылыўының анық механизмине ийе болмаған нормалар ҳуқықты тәртипке салыўдағы бослықларды пайда етеди ҳәм бул өз гезегинде, коррупцияға жол ашады. Сол себепли, Әдиллик министрлиги усы сертификаты бериў тәртибин ислеп шығыў ҳәм оның ҳуқықый нәтийжелерин анық көрсетип өтиў кереклигин атап өтпекте.

- Әдиллик министрлиги regulation.gov.uz порталында пуқаралардың усы жойбар бойынша билдирген усыныс ҳәм пикирлерин ҳәр тәреплеме, пуқталық пенен үйренип шығыўды атап өткен ҳәм өз жуўмақларына усы пикир-усыныслардан көширмелерди қосымша еткен.

Әдиллик министрлигиниң усы талаплары тийкарында Мәмлекетлик тест орайы жойбарды қайтадан көрип шығыўы ҳәм белгиленген тәртипте Министрлер Кабинетине киргизиўи керек.

Ислам Матеков.

Сайтымыздың телеграмдағы каналына ағза болың: https://t.me/karinformuz

Кеше, 18:53
Көрилди: 141
Пикирлер: 0
Баспа ушын