Дизимнен өтиў Кириў
Сайтқа кириў
Качественные бесплатные шаблоны dle скачать с сайта



Жаңаланған суў тармағы пайдаланыўға тапсырылды

Жаңаланған суў тармағы пайдаланыўға тапсырылды
Усы жылдың 18-май күни Қарақалпақстан Республикасы Жоқарғы Кеңесиниң Баслығы М.Ерниязов Тахтакөпир районы орайынан 50 километрден аслам қашықлықта жайласқан «Мүлк» аўыл пуқаралар жыйыны «Бийдай көл» аймағындағы шарўашылық пенен шуғылланып атырған шарўалардың ҳалынан хабар алды.
Бүгинги күнде Президентимиз басшылығында барлық тараўлар сыяқлы аўыл хожалығының жетекши тармағы болған шарўашылықты раўажландырыў, эконмикадағы үлесин арттырыўға айырықша итибар қаратылмақта. Ҳәзирги ўақытта дийқан ҳәм фермерлерди, соның ишинде, шарўашылық хожалықларын қоллап-қуўатлаў мақсетинде оларға кредитлер ажыратыў, өнимлерин экспортқа шығарыў, зәрүрли техникаларды сатып алыў, салық төлемлери бойынша бир қатар жеңилликлер бериў бағдарында үлгили жумыслар алып барылмақта.
Жаңаланған суў тармағы пайдаланыўға тапсырылды
Әсиресе, республикамыздың Тахтакөпир, Қоңырат ҳәм Қанлыкөл районларын шарўашылық районларына айландырыў бойынша жүргизилип атырған жумысларды айырықша атап өтиў орынлы.
Тахтакөпир әзелден шарўашылыққа қәнигелескен район болып, бул жердеги шарўалар тәрепинен халқымызға керекли болған гөш, сүт, жүн ҳәм басқа да усы сыяқлы жоқары сападағы өнимлер жеткерип берилмекте.
Бүгинги күнде районда 65 фермер хожалығы усы тараўда жумыс алып барып атырған болса, олар тәрепинен 429 мыңға шамалас шарўа маллары күтимли бағылмақта. Быйылғы жылы районда шарўашылық бағдары бойынша 26 жойбардың әмелге асырылыўы, оларға 7 млрд сумнан аслам қаржы ажыратылыўы белгиленген. Буларға қосымша шарўашылық хожалықларында 4 мың 483 бас шарўа малларын бағыў жобаластырылған.
Жаңаланған суў тармағы пайдаланыўға тапсырылды
Илаж даўамында усы аймақта шарўашылық пенен шуғылланыў ушын еледе қолайлық жаратыў мақсетинде жаңаланған суў тармағының салтанатлы ашылыўы болып өтти.
Жаңаланған суў тармағы пайдаланыўға тапсырылды
Райондағы «Жаңадәрья» қаракөлшилик орайына мотоцикл, сондай-ақ, алдынғы шарўаларға қымбат баҳалы саўғалар тапсырылды.
- Мине, бүгин аймағымызда жаңаланған суў тармағы пайдаланыўға тапсырылды. Бул тараўдағы раўажланыўлар ушын үлкен қәдем болып есапланады. Бизиң «Жаңадәрья» қаракөлшилик орайы да усындай ғамқорлық ҳәм итибардан руўхланған ҳалда, елимиз экономикасы ушын бар күш-жишеримизди жумсаўға, тараўда алдынғы инновациялық жойбарларды қолланып, жаңа шеклерге қарай қәдем таслаўға ҳәрекет етип атырмыз, - дейди «Жаңадәрья» қаракөлшилик орайы баслығы Шарап Акаев.
Жаңаланған суў тармағы пайдаланыўға тапсырылды
Сондай-ақ, илаж даўамында палўанлар гүреси, қошқар дүгистириў, атлар жарысы сыяқлы миллий спорт ойынларынан жарыслар болып өтти. Усы жерге жыйналған шарўалар спорт беллесиўлерин тамашалап, спортшыларды қоллап-қуўатлап отырды.
Аймақта шарўашылық пенен шуғылланып атырғанлар ушын аўыл хожалығы өнимлери, өнерментшилик буйымлары, китаплар, сондай-ақ, ветеринариялық дәри-дармақ өнимлери ярмаркасы шөлкемлестирилди.
Жаңаланған суў тармағы пайдаланыўға тапсырылды
Байрам мүнәсибети менен көркем өнер шеберлери ҳәм жас атқарыўшыларының концерт бағдарламасы жыйналғанларға жоқары кейпият инәм етти.
Илажға Өзбекстан Республикасы Президентиниң кеңесгөйи Т.Худайбергенов қатнасты.

Ислам Матеков,
Қарақалпақстан хабар агентлигиниң шолыўшысы.
Автордың түсирген сүўретлери.


Сайтымыздың телеграмдағы каналына ағза болың: https://t.me/karinformuz

20-05-2019, 12:34
Көрилди: 1307
Пикирлер: 0
Баспа ушын