Дизимнен өтиў Кириў
Сайтқа кириў
Качественные бесплатные шаблоны dle скачать с сайта



Қарақалпақстанда Қызыл китапқа киргизилген цистанхе өсимлигин қытайлылар нызамға қайшы түрде терип алып атырғаны мәлим етилди

Қарақалпақстанда Қызыл китапқа киргизилген цистанхе өсимлигин қытайлылар нызамға қайшы түрде терип алып атырғаны мәлим етилди
Телеграм тармағындағы «Ekologuz» каналына жолланған хабарға муўапық, Өзбекстан Қызыл китабына киргизилген Әмиўдәрья дельтасы, Қызылқум ҳәм Үстирт тегислигинде кең тарқалған ҳәм «шөл женьшени», «саҳрадағы өмир тамыры», «алтын тамыр» деп аталатуғын цистанхе өсимлигин Төрткүл районы «Анҳорли» МПЖ «Боғяп каналы» қурылысы ушын келген қытайлылар нызамға қайшы түрде жумысшыларға тергизип алдырмақта.

«Қарақалпақстан Экология ҳәм қоршаған орталықты қорғаў комитети усы ҳуқықбузарлықлардың алдын алып, емлик қәсийетке ийе өсимликлерди сақлап қалып, олардың нызамға қайшы түрде сырт еллерге шығып кетиўине жол қоймайды, деп исеним билдиремиз», - деп жазылған хабарда.

Хабарда қосымша етилиўинше, Қарақалпақ мәмлекетлик университетиниң экология ҳәм топырақтаныў кафедрасы доценти Н.Мамутовтың сөзлерине қарағанда, 2 мың жылдан берли Қытай медицинасында пайдаланылып киятырған усы өсимлик көплеген кеселликлерге ем болып, өмирди узайтыў қәсийетине ийе. Цистанхе буўынлардағы аўырыўлар, бөтеке кеселликлерин емлеў, сондай-ақ, еслеў қәбилети ҳәм иммунитетти беккемлеў, нервти тынышландырыўда, әсиресе, бас мий өсимтесиниң алдын алыўда әҳмийетли дәрилик қәсийетке ийе болып табылады.

Ислам Матеков.

Сайтымыздың телеграмдағы каналына ағза болың: https://t.me/karinformuz

25-04-2021, 17:49
Көрилди: 1876
Пикирлер: 0
Баспа ушын