Дизимнен өтиў Кириў
Сайтқа кириў
Качественные бесплатные шаблоны dle скачать с сайта



Отлы сезим ҳәм йошлы қәлб ийеси


Усы жыл 11-май күни Бердақ атындағы Қарақалпақ мәмлекетлик университетиниң Мәденият сарайында Өзбекстанға мийнети сиңген мәденият хызметкери шайыр Бахтыяр Генжемуратовтың 60 жыллығына бағышланған «Отлы сезим ҳәм йошлы қәлб ийеси» атамасында әдебий әнжуман болып өтти.
Әдебий әнжуманды университет ректоры, техника илимлериниң докторы А.Реймов кирис сөз бенен ашты.
Илажда Қарақалпақстан Республикасы Жоқарғы Кеңесиниң комитет баслығы Д.Қурбаниязов шайыр Б.Генжемуратовтың туўылғанының 60 жыллығы мүнәсибети менен Қарақалпақстан Республикасы Жоқарғы Кеңеси ҳәм Министрлер Кеңесиниң қутлықлаўын оқып еситтирди.
Буннан кейин Қарақалпақстан Жазыўшылар аўқамының баслығы, Қарақалпақстан халық шайыры К.Каримов шығып сөйлеп, шайырдың дөретиўшилиги ҳәм оның қосықларының әҳмийетине тоқтап өтти. Сондай-ақ, профессор Қ.Оразымбетов «Лирикалық қаҳарманның кеўил әлеми» атамасында, доцент Ж.Сағыйдуллаева «Сөз қәдирин билген аламан ел болар…» атамасындағы илимий баянатлары менен қатнасты.
Әдебий әнжуманда Өзбекстан Жазыўшылар аўқамы баслығының биринши орынбасары М.Ҳошиматов, педагогика илимлериниң докторы, профессор Қ.Йўлдашев, Қарақалпақстан халық шайыры, сенатор Г.Аннақлычева, мийнет ветераны Ү.Әширбеков ҳәм басқалар шығып сөйлеп, шайырдың бүгинги әдебий орнына жоқары баҳа берди.
Атап өтилгениндей, Б.Генжемуратов ҳәзирги қарақалпақ поэзиясында өзине тән көркем пикирлеў дүньясы ҳәм поэтикалық сүўретлеў усыллары менен «жаңаша толқын» пайда еткен талантлы шайырлардың бири.
Б.Генжемуратовтың «Әптаптың өмири», «Саратан», «Оқ қадаған ай», «Сайланды шығармалар» деп аталған поэтикалық топламлары қарақалпақ тилинде, «Укуздарё битиклари» атамасындағы қосықлар ҳәм поэмалар топламы өзбек тилинде баспадан шықты.
Шайырдың бир дүркин қосықлары «Түрк шеърияти антологияси» (Анқара, 2006) ҳәм «XX аср ўзбек шеърияти антологияси» (Тошкент, 2007) киргизилген. Шайыр Батыс ҳәм Шығыс классиклериниң қосықларын қарақалпақ тилине сәтли аўдарды ҳәм бул аўдармалар «Лирика» (1992) деген атама менен өз алдына топлам етип баспадан шықты.
Оның бир қатар қосықлары өзбек, қазақ, түрк, рус, корейс, поляк ҳәм француз тиллерине аўдарма исленген.
Әнжуман соңында шайыр Б.Генжемуратов жыйналғанларға өз миннетдаршылығын билдирди.
Шайырдың нама қосықларынан дүзилген әдебий-музыкалық концерт бағдарламасы жыйналғанлар нәзерине усынылды.
Әнжуманға Өзбекстан Республикасы Олий Мажлиси Сенатының комитет баслығы Б.Матмуратов қатнасты ҳәм шығып сөйледи.

Қарақалпақстан хабар агентлиги

Сайтымыздың телеграмдағы каналына ағза болың: https://t.me/karinformuz

13-05-2019, 12:05
Көрилди: 811
Пикирлер: 0
Баспа ушын