2019-жыл 27-октябрь күни Қарақалпақстан Республикасы И.В.Савицкий атындағы мәмлекетлик көркем-өнер музейинде «Ақ төбедеги қала» атамасындағы көшпели көргизбениң ашылыўы болып өтти, деп жазады музейдиң telegram каналында.
«Өзбекстанда Қазақстан жылы» шеңберинде өткерилип атырған бул халық аралық көргизбеден Ақтөбе ўәлаяты көркем өнер музейи фондында сақланып атырған экспонатлар орын алған. 2019-жыл 27-30-октябрь күнлери аралығында Нөкис қаласы турғынлары ҳәм мийманлары Қазақстанлы художниклердиң 70 тен аслам живопись ҳәм графикалық дөретпелерин көрип тамашалаў имканиятына ийе болады.
Көргизбениң ашылыў салтанатында Қарақалпақстан Республикасы Мәденият министри орынбасары А.Ниетуллаев сөзге шығып, жыйналғанларды мәмлекетлер арасындағы халық аралық байланысларды беккемлеўге хызмет ететуғын, үлкен әҳмийетке ийе болған көргизбе менен қутлықлады. Ақтөбе ўәлаяты көркем өнер музейи тәрепинен Қарақалпақстан Республикасы И.В.Савицкий атындағы мәмлекетлик көркем-өнер музейине М.Габдурахмановтың «Ақмолағайдың порлы таўлары» атлы картинасы саўға етилди ҳәм бул дөретпе музей фондынан орын алды.
Сайтымыздың телеграмдағы каналына ағза болың: https://t.me/karinformuz
