Трейлер. АҚШ–Вьетнам урысына байланыслы қупыя ҳүжжетлердиң жәрияланыўы ҳаққында фильм шығарылды

Социаллық тармақларда белгили кинематограф Стивен Спилбергтиң «Қупыя ҳүжжетлер» атлы жаңа картинасының трейлери пайда болды. Картина «Пентагон ҳүжжетлери» деген ат пенен белгили болған тарийхый ўақыяға тийкарланады. Фильмдеги баслы роллерди белгили актриса Мэрил Стрип ҳәм актёр Том Хэнкс атқарған.
Картина сюжети АҚШ Қорғаныў министрлигиниң Вьетнам урысындағы АҚШтың роли изертленген бирнеше жыллық жумыслардың журналистлердиң қолына түсиўин сөз етеди. 1971-жылы «The New York Times» пенен «The Washington Post» басылымлары ҳүжжеттиң үзиндилерин журтшылыққа жәрия еткен еди. Мақала «Америка–Вьетнам қатнасықлары, 1945-1967: Изертлеў» деген атамада жарық көрген. Нәтийжеде ҳүкимет ҳәм журналистлер арасында үлкен қарама-карсылық жүзеге келди.
Картинада Том Хэнкс «The Washington Post» газетасының редакторы Бен Брэдли, ал Мэрил Стрип болса ири ғалаба хабар қуралын басқарған тарийхтағы дәслепки ҳаял – Кей Грэм атлы редактор ролин атқарған.
Фильм усы жылдың 22-декабрь күни сатылыўға шығарылады. Төменде сиз фильмниң трейлерин тамашалаўыңыз мүмкин.



Ислам Матеков.