15-ноябрь күни Нөкис қаласы «Орайлық дийқан базары»нда «Пал өнимлери байрамы» басланды, деп жазады madeniyat.uz. Қарақалпақстан Республикасы Ветеринария ҳәм шарўашылықты раўажландырыў комитети ҳәм Палҳәррешилер ассоциациясының шөлкемлестириўинде ҳәр жылы өткерилиўи дәстүрге айланған байрам ярмаркасында республикамыздағы палҳәррешилик пенен шуғылланатуғын 70ке шамалас фермер хожалықлары ҳәм жеке исбилерменлер өз өнимлери менен қатнаспақта.
Өткерилип атырған байрам республикамызда жумыс алып барып атырған палҳәррешилерди бирлестириўге, өз-ара тәжирийбе алмасыўға жәрдем береди. Байрам шеӊберинде Қарақалпақ мәмлекетлик жас тамашагөйлер театры, Қарақалпақ мәмлекетлик қуўыршақ театры жәмәәти тәрепинен таярланған сахналық көринислер ҳәм Өзбекстан мәмлекетлик филармониясы Қарақалпақстан Республикасы бөлими көркем өнер шеберлериниӊ атқарыўындағы концерт бағдарламасы жыйналғанларға инам етилди.
Сайтымыздың телеграмдағы каналына ағза болың: https://t.me/karinformuz
