Қарақалпақстан Республикасы Айрықша жағдайлар басқармасы ҳәм Қарақалпақстан Республикасы Өрт қәўипсизлиги басқармасы менен биргеликте Қоңырат районындағы бир қатар объектлерде айрықша жағдайлар жүз бергенде қутқарыў жумысларын шөлкемлестириў бойынша ис-реже ислеп шығылған еди. Усы режеге муўапық, 20-ноябрь күни райондағы бирқанша объектлерде арнаўлы хызметлер менен биргеликте тактик оқыў шынығыўлары шөлкемлестирилди. Дәслеп район ҳәкимлиги мәжилислер залында Қоңырат районлық Айрықша жағдайлар ҳәм Өрт қәўипсизлиги бөлими басшылары тәрепинен райондағы кәрхана хәм шөлкем басшылары қатнасында жыйналыс болып өтти. Жыйналыста 20-22 ноябрь күнлери аралығында өткерилиўи тийис болған тактик оқыў шынығыўларының әҳмийети түсиндирилди.
Буннан соң режеге муўапық, райондағы 63-санлы автобаза майданына арнаўлы хызметлер менен биргеликте қураллар көриктен өткерилди.
Районлық медицина бирлеспесинде биринши медициналық тез жәрдем отряды, Қызыл Ярым ай Жәмийетиниң жер қозғалыўы нәтийжесинде жәбирленген шахсларға медициналық жәрдем көрсетиў ҳәрекетлери тактик шынығыўлар арқалы үйренилди.
Буннан басқа да, 6-санлы Қоңырат компрессор станциясында, аймақлар аралық Темир жол узели кәрханасында ҳәм «Таллық» аўыл пуқаралар жыйыны аймақларында тәбийий, техноген түрдеги айрықша жағдайлар ҳәм жер силкиниўлери нәтийжесинде жүз бериўи мүмкин болған аварияларды сапластырыў ҳәрекетлери бойынша арнаўлы тактик оқыў шынығыўлары өткерилди.
Сайтымыздың телеграмдағы каналына ағза болың: https://t.me/karinformuz
