Тест сынақларысыз студент болмақшы болған Жаслар аўқамы белсендилери қандай ҳүжжетлерди тапсырыўы керек?

Өзбекистан Республикасы Министрлер Кабинетиниң 2017-жыл 14-ноябрьдеги №914 қарарына муўапық, Өзбекистан жаслар аўқамының арнаўлы усынысы бойынша тест сынақларысыз ҳәм кәсиплик (дөретиўшилик) имтиханларсыз мәмлекетлик грант тийкарында студент болыў ушын талабанлардан төмендеги ҳүжжетлер талап етиледи:

1. Районлық (қалалық) комиссия баслығының атына арза;
2. Улыўмалық орта билим (11-класс тийкарында) ямаса орта-арнаўлы, кәсип-өнер мәкемесин питкергени ҳаққындағы ҳүжжет ҳәм баҳалары көрсетилген қосымшаның нусқалары;
3. Билимлендириў орнынан питкериўши оқыўшы екенлиги ҳаққында мағлыўматнама (мағлыўматнамада ақырғы еки жылда пәнлерди өзлестириў баҳалары көрсетиледи);
4. 086-У формасындағы медициналық мағлыўматнама;
5. Паспорт (паспорт жасына жетпегенлер ушын туўылғанлығы ҳаққындағы гүўалық)тың нусқасы;
6. 3,5х4,5 см көлемдеги 4 дана реңли фотосүўрет;
7. Мийнет дәптершесиниң нусқасы (жумыс стажы болса);
8. Жаслар аўқамы системасында ерискен нәтийжелерин тастыйықлайтуғын ҳүжжетлердиң (диплом, сертификат, ҳүрмет жарлығы ҳәм басқа ҳүжжетлер) нусқалары.

Талабанлар усы көрсетилген ҳүжжетлерди ҳәр жылы 1-марттан 25-мартқа шекемги аралықта Өзбекистан жаслар аўқамының районлық (қалалық) Кеңеслерине усыныўы керек.

Ислам Матеков.