![](\"http://img.uz/d/2017/11/5a1811fd0d216.jpg\")
«ENGLISH CLUB.KARSU» клубы дәслеп өткен оқыў жылында университетимиздиң шет тиллери факультетинде инглис тили ҳәм әдебияты бағдарының студенти Дилафруз Абдинабиеваның басламасы менен шөлкемлестирилген еди. Быйылғы оқыў жылында клуб шөлкемлестириўшиси Дилафруз Абдинабиева клубтың жумысларын жетилистириў ҳәм аудиториясын кеңейтиў мақсетинде Жаслар аўқамы басланғыш шөлкеми менен биргеликте жойбар ислеп шықты. Клуб өз әтирапына университетимиздиң инглис тилин үйрениўди ҳәм үйретиўди қәлеген студентлерин жәмлеген болып, «теңлеске-теңлес» принципи тийкарында жумыс алып бармақта.
![](\"http://img.uz/d/2017/11/5a18121a3d65c.jpg\")
![](\"http://img.uz/d/2017/11/5a18123e090fe.jpg\")
Университетимиз ректораты тәрепинен клубтың нәтийжели жумыс алып барыўы ушын зәрүр шараятлар жаратып берилмекте. Ең заманагөй информациялық техникалар менен тәмийинленген руўхыйлық ҳәм ағартыўшылық бөлиминиң мәжилислер залы ҳәм «Ҳәрекетлер стратегиясы» ханасы клубтың өз жумысларын алып барыўы ушын ажыратып берилди.
«ENGLISH CLUB.KARSU» клубы еки мезгилде, ҳәптениң ҳәр дүйшемби, сийшемби, сәршемби, пийшемби ҳәм жума күнлери турақлы түрде өткерилип келинбекте. Клуб «Speaking Club», «English for everyone», «Music Club» сыяқлы бирнеше секцияларда жумыс алып барады.
![](\"http://img.uz/d/2017/11/5a18125c185e2.jpg\")
![](\"http://img.uz/d/2017/11/5a181274db646.jpg\")
«Speaking Club» ҳәптениң ҳәр дүйшемби күни саат 13:00 де, «English for everyone» ҳәптениң ҳәр дүйшемби ҳәм жума күнлери саат 14:00 де, сийшемби ҳәм пийшемби күнлери саат 11:00 де ҳәм 16:00 де, «Music Club» ҳәр айдың ақырғы пийшемби күнинде саат 13:00 де өткерилмекте.
Тил үйрениўди ямаса өзи сыяқлы теңлеслерине үйретиўди қәлеўши студентлерди клуб ағзалығына шақырып қаламыз.
Ислам МАТЕКОВ
