Өзбекстан Республикасы Орайлық банки тийкарғы ставка, яғный қайта қаржыландырыў ставкасын 1 процентке түсирип, жыллық 15 процент дәрежесинде белгиледи.
Орайлық банк тийкарғы ставканың түсирилгени ҳаққындағы қарарды сыртқы ҳәм ишки талаптың қысқарыўы шараятында экономикалық жеделликтиң төменлеўин есапқа алып, инфляциялық прогнозлардың пәсейиўге қарай қайта көрип шығылғаны менен түсиндирди.
Усы жылдың екинши шерегинде ҳәм жыл ақырына шекем инфляция дәрежесине талап факторлары тәрепинен басым нормалласыўы ҳәм кемейиўин есапқа алып, инфляцияның жаңаланған прогнозлық көрсеткишлерине муўапық, 2020-жылдың жуўмағы бойынша инфляция дәрежеси дәслепки прогноздан (12-13,5 процент) 1 процентке төменлеп, 11-12,5 процентти қураўы күтилмекте.
Хош, қайта қаржыландырыў ставкасы түсирилиўи нәтийжесинде алдын алынған кредитлердиң үстемеси де азая ма? Бул сораў көпшиликти қызықтырмақта.
Орайлық банктиң басқарыў директоры Мамаризо Нурмуратовтың атап өтиўинше, егер кредит шәртнамасының шәртлеринде кредит проценти Орайлық банктиң қайта қаржыландырыў ставкасына байланыстырып қойылған болса, автоматластырылған түрде сол кредитлердиң үстемеси де азаяды.
Ислам Матеков.
Сайтымыздың телеграмдағы каналына ағза болың: https://t.me/karinformuz
