Елимиз пуқараларын коронавирус инфекциясынан тынымсыз мийнети арқасында емлеп атырған шыпакерлеримиздиң ҳәрекетлери өз жемисин бермекте. Бул шыпакерлерде усы кеселликке қарсы жеңис руўхын оятса, емленип атырғанлар ушын болса ертеңги күнге деген исенимин асырмақта.
ҚР ДСМның мағлыўмат бериўинше, бүгин, 27-апрель сәнесинде де коронавирус инфекциясына қарсы гүресимиздиң табыслары даўам етип, Республикалық жуқпалы кеселликлер емлеўханасынан 20 наўқас кеселликтен пүткиллей саўалып шықты. Бул пуқараларымыз шыпакерлерге өзлериниң шексиз миннетдаршылықларын, алғысларын билдирди ҳәм ҚР Денсаўлықты сақлаў министрлигиниң жуўапкер хызметкерлери қатнасында реабилитациялық орайға шығарып салынды.
Шыпакерлеримиздиң бул кеселликти емлеўде өз тәжирийбелерин асырып барыўы ҳәм Дүнья жүзилик денсаўлықты сақлаў шөлкеминиң, сондай-ақ, коронавирус пандемиясына қарсы нәтийжели табысларға ерискен мәмлекетлер қәнигелериниң усыныслары тийкарында бул кеселликтен тәўир болғанлар саны сезилерли дәрежеде өспекте.
Еслетип өтемиз, Қарақалпақстанда коронавирус инфекциясынан бүгинги саўалып шыққан 20 наўқас пенен қосқанда улыўма тәўир болғанлар саны 49 адамға жетти.
Сайтымыздың телеграмдағы каналына ағза болың: https://t.me/karinformuz
