Усы жылдың 2-июнь күни саат 11:37 лер шамасында Беруний районы Беруний көшесинде жайласқан «Икром Азиз» ЖШЖға қараслы универсал (пропан-метан-солярка) жанармай қуйыў шақапшасында өрт жүзеге келген.
ӨзР Айрықша жағдайлар министрлигиниң берген дәслепки мағлыўматларына қарағанда, өрт ақыбетинде жер үстинде жайласқан 25 тонналық 2 сыйымлылық ҳәм 2 дана «ЗИЛ-130» жанармай тасыў автомашиналары өртенип кеткен.
Сондай-ақ, усы сыйымлылық жанында 10 тонналық 3 дана бос турған, шама менен 30-50 тонналық 2 дана сыйымлылық жайласқан.
Жүз берген жағдай бойынша ўақыя орнына Қарақалпақстан Республикасы Айрықша жағдайлар басқармасының 6 өрт-қутқарыў топары жетип барған.
Ҳәзирше жүзеге келген өрттиң себеби жанармайды қуйыўда өрт қәўипсизлиги қағыйдаларына әмел етпеў болыўы мүмкинлиги атап өтилген.
Жәбирленгенлер ҳәм қайтыс болғанлар ҳаққында хабарлар келип түспеген.
Ислам Матеков.
Сайтымыздың телеграмдағы каналына ағза болың: https://t.me/karinformuz
