Өзбекстан Республикасы Президенти Ш.М.Мирзиёевтиң 2020-жыл 2-октябрь күни Қарақалпақстан Республикасына сапары даўамында және Қарақалпақстан Республикасы Жоқарғы Кеңесиниң гезексиз сегизинши сессиясында берилген тапсырмалар ҳәм кеңейтилген тәризде өткерилген мәжилис протоколы қарарына муўапық, ӨзР Мәденият министрлигине тийисли министрлик ҳәм ведомостволар менен биргеликте 3 ай мүддетте Өзбекстан мәмлекетлик консерваториясының Нөкис филиалын шөлкемлестириў бойынша Ҳүкиметлик қарар жойбарын ислеп шығыў ўазыйпасы жүклетилген.
Сондай-ақ, усы ҳүжжет тийкарында 2021-2022-оқыў жылынан баслап Ташкент мәмлекетлик аграр университетиниң Нөкис филиалы негизинде Қарақалпақстан аўыл хожалығы ҳәм агротехнологиялар институты шөлкемлестириледи.
Қарақалпақстан Республикасындағы жоқары оқыў орынларында оқып атырған қәбилетли жасларды хошаметлеў мақсетинде Қарақалпақ халқының атақлы тулғалары атындағы мәмлекетлик стипендиялар шөлкемлестириледи.
Қарақалпақ мәмлекетлик университетиниң бюджеттен тыс қаржылары есабынан университет жанында илимий-изертлеў, билимлендириў, әмелият ҳәм өндириске бағдарлаў процеслерин өз ишине алатуғын «Химиялық технология» илимий-технологиялық лаборатория кластери шөлкемлестириледи.
Ислам Матеков.
Сайтымыздың телеграмдағы каналына ағза болың: https://t.me/karinformuz
