Алимент төлеўден бас тартқан адамларды мәжбүрий жәмийетлик жумыслар ҳәм транспорт қуралын басқарыў ҳуқықын ўақытша шеклеў усынысы билдирилди. Бул ҳаққында бүгин, 9-декабрь күни ӨзР Әдиллик министрлигинде Олий Мажлис Сенаты Баслығы Т.Норбоева басшылығында шаңарақ нызамшылығын жетилистириў мәселелерине арналған жыйналыста атап өтилген.
Жыйналыс даўамында Әдиллик министри Р.Давлетов алимент төлеў әмелияты бойынша ҳәзирги жағдай ҳәм усы мәселе бойынша сырт еллердиң тәжирийбесин салыстырмалы анализлеп, тараўды жетилистириў бойынша төмендеги усынысларды билдирген:
- шаңараққа таярлаў бойынша мәжбүрий курсларды бийпул тийкарда енгизиў;
- некелениўшилерди бийпул тийкарда бийпушлық бойынша медициналық тексериўден өткериў;
- некениң дәслепки 3 жыллығында жас шаңарақлардың материаллық абаданлығын тәмийинлеў мақсетинде жеңилликли шәртлерде турмыслық, ипотека ҳәм автокредитлер ажыратыў;
- алимент тайынлаў ҳәм төлеў менен байланыслы мәселелерди тәреплер ажырасыў ҳаққында судқа мүрәжат еткен ўақытта мәжбүрий түрде шешиў;
- алимент төлеўден бас тартқан адамларға мәжбүрий жәмийетлик жумыслар және транспорт қуралын басқарыў ҳуқықын ўақытша шеклеў тәризиндеги тәсир шараларын қоллаў.
Билдирилген усыныслар бойынша норативлик-ҳуқықый ҳүжжет жойбарын ислеп шығыў мәселесинде келисимге келинген.
Ислам Матеков.
Сайтымыздың телеграмдағы каналына ағза болың: https://t.me/karinformuz
