Усы жылдың 13-декабрь, екшемби күни саат 14:00 лер шамасында Хожели районы «Водник» ППЖ аймағында жасаўшы 5-класс оқыўшылары Кетбаев Султанбек ҳәм Ержанов Руфат өз үйлеринен шығып, шана айдаў мақсетинде Әмиўдәрьяға барған ҳәм тосаттан музға ойылып, суўға түсип кеткен. Буның ақыбетинде, жас өспирим С.Кетбаев суўдан шыққан, ал Р.Ержановты ҳәзирги саатларға шекем табыў имканияты болмай атыр. Бул ҳаққында Хожели районы ҳәкимлиги Мәлимлеме хызмети хабар берди.
Ҳәдийсе бойынша Қарақалпақстан Республикасы Айрықша жағдайлар басқармасы, Хожели районлық ИИБ, район ҳәкимлиги ҳәм кең жәмийетшилик пенен бирге баланы табыў ушын барлық илажлар көрилмекте.
«Сонлықтан, ҳүрметли пуқаралар жас өспирим нәрестемизди табыў ушын жәрдем етиўиңизди, балықшалардан балық аўлаў ушын арналған үскенелер жәрдеминде баланы табыўға көмеклесиўиңизди өтиниш етемиз! Сондай-ақ, бул жағдайға бийпарқ болмаған ҳәр бир инсанды кеўиллилер сыпатында көмек бериўге шақырамыз! Бағдар: Нөкистен Хожелиге өтетуғын Әмиўдәрья көпири», - деп жазылған ҳәкимлик хабарландырыўында.
Сайтымыздың телеграмдағы каналына ағза болың: https://t.me/karinformuz
