Ҳәзирги ўақытта Немис Миллий университетлер бирлеспесиниң Өзбекстандағы филиалының (DVV) қаржыландырыўы тийкарында әмелге асырылып атырған жойбар шеңберинде «Истиқболли авлод» Республикалық социаллық орайының Қарақалпақстан Республикасы бөлими тәрепинен Нөкис қаласында мәлимлеме-ағартыўшылық ушырасыўлар өткерилмекте. Буннан гөзленген мақсет, халыққа консультациялық хызмет көрсетиў ҳәм жәрдемге мүтәж адамларды социаллық-юридикалық жақтан қоллап-қуўатлаў, адамларға кәсиплик билим бериў ҳәм олардың жәмийетке ийкемлесиўиниң басқа жолларын тәмийинлеў, халықты социаллық-белсене жумысларға тартыў, жаслардың ҳәм халықтың социаллық басламаларын қоллап-қуўатлаў болып есапланады.
Жойбар шеңберинде социаллық, юридикалық ҳәм психологиялық жәрдем алыў имканияты бар. Сондай-ақ, кәсиплик билимге ийе болмаған адамларды кәсипке оқытыўдың илажлары көриледи.
Жойбардың мақсетли топарларына төмендегилер киреди:
- қыйын ҳәм жумыссыз жағдайдағы жас адамлар;
- жумыссыз ҳәм социаллық жақтан қорғалмаған ҳаял-қызлар;
- мийнет мигрантлары (кетип баратырғанлар ҳәм қайтып келгенлер);
- судланғанлар, бурын судланғанлар ҳәм олардың шаңарақ ағзалары;
- халықтың социаллық жақтан қорғаўға мүтәж болған басқа топарлары.
Жоқарыда атап өтилген илажлар Нөкис қаласындағы Экономикалық кәсип-өнер колледжинде, «Наўрыз», «Жайҳун» ҳәм «Нәўпир» МПЖларда өткерилди.
Жойбардың мақсетли топарларына кириўши пуқаралар «Истиқболли авлод» Республикалық социаллық орайының Қарақалпақстан Республикасы бөлиминен өзлерине керекли мағлыўматларды Нөкис қаласы А.Шамуратова көшеси 86-жай (Архитектуралық институт имараты, бурынғы Республикалық китапхана) мәнзилинен яки ianukus.uz@gmail электрон почта мәнзилинен, сондай-ақ, Телеграм ҳәм ватсап мессенджерлерине жалғанған +99895 605 94 94 исеним телефонынан алыўы мүмкин. Жумыс ўақты: Дүйшембиден жума күнине шекем саат 10:00 ден 17:00 аралығы.
Барлық хызметлер бийпул көрсетиледи.
«Истиқболли авлод» Республикалық социаллық орайының Қарақалпақстан Республикасы бөлими.
Сайтымыздың телеграмдағы каналына ағза болың: https://t.me/karinformuz
