Бүгин түнде Қарақалпақстан аймағына Россияның (Москва областы) Европа аймақлары үстинде қәлиплескен суўық ҳәм ығал ҳаўа массалары кирип келиўи басланды. Қарақалпақстанның Қоңырат, Мойнақ ҳәм Тахтакөпир районлары аймағында қар жаўды. Самалдың тезлиги 17-22 м/с қа шекем күшейди, айырым жерлерде самалдың тезлиги 23-28 м/с қа жетти.
«Өзгидромет»тиң хабар бериўинше, ертең, 13-март күни Қарақалпақстан аймағы суўық ҳаўа массалары тәсиринде болады. Айырым жерлерге қар жаўыўы мүмкин. Ҳаўаның температурасы 3-8 градусқа шекем суўытады.
14-мартта республикамыз аймағында жаўын-шашын болыўы күтилмейди. Түнги ўақытлары 10-15 градус суўық, ал күндиз 2-7 градус суўық болыўы күтилмекте.
12-14-мартта самалдың тезлиги 17-22 м/с, айырым жерлерде 23-28 м/с қа шекем күшейиўи мүмкин.
15-мартта түнде суўық антициклонның тәсири күшейеди ҳәм ҳаўаның температурасы 2-7 градусқа шекем түседи. Күндиз болса ҳаўаның температурасы бираз көтерилип, 3-8 градус жыллы болыўы күтиледи. Бул март айының ортасы ушын нормадан 8-10 градусқа төмен болып табылады.
Қар жаўыўы ҳәм төмен температура республикамыздағы жолларда музғалақ пайда болыўына алып келиўи мүмкин.
Ислам Матеков.
Сайтымыздың телеграмдағы каналына ағза болың: https://t.me/karinformuz
