14-апрель күни пайтахтымыз Нөкис қаласындағы «Қум аўыл», «Алланияз қаҳарман» ҳәм «Саманбай» мәкан пуқаралар жыйынлары аймағында жаңадан қурылатуғын мешитлердиң ирге тасы қаланды.
Жаңадан қурылыўы белгиленген мешитлердиң қазықларын қағыў илажына ҚР Министрлер Кеңеси Баслығының орынбасары Э.Дурдиев, Нөкис қаласы ҳәкими У.Панаев, Қарақалпақстан мусылманлары қазыятының қазысы Ш.Бауаддинов, белгили уламалар, нураный ақсақаллар ҳәм кең жәмийетшилик ўәкиллери қатнасты. Бул ҳаққында «Paziylet.uz» сайты хабар бермекте.
Илажда мүбәрек Рамазан айында жаңадан қурылысы басланып атырған мешитлердиң қурылыс жумысларының тез күнлерде, сапалы болып питиўи, мөмин-мусылманлардың усы мешитлерде еркин ибадат етилиўин Аллаҳ тааладан сорап, дуўалар оқылды.
Мағлыўмат орнында атап өтиў керек, ҳәзирги ўақытта Қарақалпақстанда улыўма 54 мешит, соннан Нөкис қаласында 4 мешит жумыс алып барып атырған болып, жаңа мешитлердиң пайдаланыўға тапсырылыўы менен олардың саны пайтахымыз бойынша жетиге жетеди.
Өткен жылы Мойнақ районында «Ҳәким ата» мешити, ал быйылғы жылы Нөкис қаласында «Муҳаммад Бахий ийшан», Қоңырат районында «Молла Исҳақ» ҳәм Мойнақ районында «Қарақум ийшан» мешитлери өз жумысын баслады.
Қарақалпақстан мусылманлары қазыятының мәлим етиўинше, жергиликли ҳәкимият, тийисли шөлкем ҳәм қурылыс мәкемелериниң келисими менен республикамызда 15 мешиттиң ашылыўына рухсат алынған.
«Қум аўыл» МПЖ аймағында қурылатуғын мешит
«Алланияз қаҳарман» МПЖ аймағында қурылатуғын мешит
«Саманбай» МПЖ аймағында қурылатуғын мешит
Ислам Матеков.
Сайтымыздың телеграмдағы каналына ағза болың: https://t.me/karinformuz
