Өзбекстан Кинематография агентлиги буйыртпасы тийкарында «Қарақалпақфильм» киностудиясы тәрепинен «Ашық аяз» ҳүжжетли фильми сүўретке алынады.
Бул фильм Өзбекстан Қаҳарманы, Өзбекстан ҳәм Қарақалпақстан халық шайыры Ибрайым Юсуповтың өмири ҳәм дөретиўшилигине арналады. Фильм Өзбекстан Республикасы Президентиниң басламасы менен сүўретке алынып атырған «Халық жүреги» дүркин фильмлериниң бири есапланады.
Сценарий авторы Муратбай Нызанов, режиссёр Әзиз Асқаров, оператор Әсенбай Асқаров. Фильмде шайырдың жасаған дәўири, жазыўшы, шайырлар ҳәм шәкиртлериниң интервьюларынан пайдаланылады.
Мағлыўмат ушын, «Халық жүреги» жойбары тийкарында буннан алдын қарақалпақ классик шайыры Бердақ Ғарғабай улының өмири ҳәм дөретиўшилиги ҳаққында ҳүжжетли фильм сүўретке алынып атырғаны ҳаққында хабар берилген еди.
Ислам Матеков.
Сайтымыздың телеграмдағы каналына ағза болың: https://t.me/karinformuz
