Жаслар менен ислесиў бойынша жаңа системаны енгизиўге арналған «Жаслар бағдарламасы»ның орынланыўын тәмийинлеў мақсетинде усы жылдың 30-апрель күни Беруний районында сектор басшыларының басламасы менен өткерилген «Жаслар форумы» шеңберинде райондағы улыўма билим бериў мектеплери оқыўшылары арасында Республикалық Руўхыйлық ҳәм ағартыўшылық орайының районлық бөлими тәрепинен «Ең жақсы китапқумар оқыўшы» таңлаўы өткерилген.
Таңлаў жуўмағына муўапық, райондағы 26-санлы улыўма билим бериў мектебиниң оқыўшысы Дилноза Гулимбаева 1-орынды ийелеп, 1 миллион сум жеңимпазы болғаны ҳаққындағы сертификатты қолға киргизген.
Олий Мажлис жанындағы Жаслар парламенти ағзасы, Қарақалпақстандағы ең жас депутатлардың бири (Халық депутатлары Тақыятас районлық Кеңесиниң депутаты) Ғайратдин Сейтековтың бизге мәлим етиўинше, таңлаў жеңимпазы болған Дилнозаға усы күнге шекем сертификатта көрсетилген пуллар берилмеген.
Жаслар парламенти ағзасы Ғ.Сейтеков машқаланы жуўапкер уйымларға мәлим етип, таңлаў жеңимпазы болған мектеп оқыўшысының ақшалай сыйлығын алыўына жәрдем берди. Яғный жеңимпаз қыз атына банк пластик картасы ашылып, 1 миллион сум ақшалай сыйлығы өткерип берилди.
Ислам Матеков,
Karinform.uz.
Сайтымыздың телеграмдағы каналына ағза болың: https://t.me/karinformuz
