Елликқала районы «Дослық» АПЖда турақлы дизимге алынған, бирақ Беруний районында жасайтуғын Р.М. усы жылдың басында Беруний районында жасайтуғын Д.К.ға жуўапкер лаўазымда ислейтуғынын билдирип, дәрихана ашыўға жәрдем бериўин айтып, өзиниң жалған ўәделерине исендирип, 1000 АҚШ доллары пулын алған.
Беруний районлық ИИБның мәлим етиўинше, аңсат табылған пулдан кеўли көтерилген Р.М. Хорезм ўәлаятындағы санаторияда дем алыў ушын жатып, ол жерде өзин «тергеўши» сыпатында таныстырып, оған арызын айтқан шыпакерлерден бириниң пулларын өндирип бериўи және басқа да машқалаларды шешип бериўин айтып, оның 1050 АҚШ доллары муғдарындағы пулларын қолға киргизген.
Сондай-ақ, Р.М. ҳәр қыйлы ўәделер менен Беруний районында жасайтуғын И.Ф., У.Р., Ф.Б. лардың пуллары ҳәм мүлкин қолға киргизип келген.
Пуқараларды алдап жүрген бул адамның алдаўлары узаққа бармады, ҳуқық қорғаў уйымлары хызметкерлери тәрепинен усланды. Оған Беруний районлық ИИБ жанындағы Тергеў бөлимшеси тәрепинен Жынаят кодексиниң тийисли статьялары менен жынаят иси ашылып, қамаққа алыў шарасы қолланылған.
Ислам Матеков,
Karinform.uz.
Сайтымыздың телеграмдағы каналына ағза болың: https://t.me/karinformuz
