Сизга қайси турдаги стипендия тўланади?

Барча талабалар стипендия олган вақтида жуда хурсанд бўлади. Бир стипендиясини иккинчисига етказмасдан шамолга совирадиган ёки стипендиясини барча зарур нарсаларига сарфлайдиган талабалар стипендия сўзининг маъносини билармикин?
Интернет глобал тармоғининг энциклопедияси ҳисобланган Wikipediaда «стипендия — таълим олаётган талабаларга мунтазам равишда ҳар ойда ёки номунтазам равишда бериладиган молиявий ёрдам» деб кўрсатиб ўтилган.
Унинг таржимасига эътибор қаратадиган бўлсак, «стипендия» лотин тилидаги «stipendium» сўзидан олинган бўлиб, бизнингча «маош» маъносини билдиради.
Стипендиянинг бир неча турлари бор. Улар қўйидагича:
Академик стипендия — бу ўтган сессия натижаларига биноан, талабанинг фанлардан ўзлаштириш даражасига қараб бериладиган маблағ.
Биринчи курс талабаларига дастлаб сессиясини топширгунга қадар барчасига бир хил, яъни минимал турдаги стипендия тўланади. Юртимизда бу «учлик» стипендиянинг миқдорига тенгдир.
Ижтимоий стипендия — бу қонунда белгиланган тартибда кам таъминланган ёки ёрдамга муҳтож талабаларга бериладиган маблағ.
Номдор стипендия — фанлардан аъло баҳоларга улгурадиган талабаларга давлат ёки олий таълим муассасаси томонидан бериладиган маблағ. Масалан, Президент стипендияси, Бердақ номидаги давлат стипендияси.
Ташкилот стипендияси — олий таълим муассасассини битиргандан сўнг ишга олиш мажбуриятини ўз зиммасига олган ташкилот томонидан бериладиган маблағ.
Бир марталик молиявий ёрдам — талабанинг заруриятига қараб семестрига бир марта бериладиган маблағ.
Юртимизда «5» лик стипендиясининг миқдори 505 278 сўм, «4» лик стипендияси миқдори 378 959 сўм, «3» лик стипендияси миқдори 252 639 сўмга тенг қилиб белгиланган.
Эслатиб ўтамиз, яқинда Президентимиз фармонига биноан, стипендиялар миқдори оширилди. Бу ҳақда кейинги мақолаларимизда тўлиқроқ маълумот бериб борамиз.

Сахибжамал Есемуратова