Өзбекстан Республикасы Президенти Шавкат Мирзиёев басшылығында өткерилген мәжилисте мәмлекетимиз бойлап «Жасыл мәкан» улыўма миллий жойбарын әмелге асырыў илажлары көрип шығылып, усы жылдың 10-декабрь күнине шекем терек егиў бойынша «әҳмийетли 40 күнлик» жәрияланған еди.
Әжинияз атындағы Нөкис мәмлекетлик педагогикалық институты жәмәәти ҳәм студент жаслары усы ўазыйпалардан келип шығып 2-ноябрь күнинен баслап институт әтирапы, сондай-ақ, пайтахтымыз Нөкис қаласындағы «Дослық» каналы бойындағы бос жерлерге ҳәр қыйлы декоратив, мийўе ҳәм саялы терек нәллерин отырғызыў, жерлерди жабайы шөплерден тазалаў, абаданластырыў ҳәм көгалландырыў сыяқлы жумысларды атқарып келмекте.
- Бүгин институтта шөлкемлестирилген Студентлер кеңеси ағзаларының басламасы менен институт әтирапына экология комитети тәрепинен усыныс етилген катальпа, павловния, япон сафорасы, қарағаш, тут ҳәм акация сыяқлы терек нәллерин отырғыздық, - дейди НМПИ жаслар жетекшиси Байрам Гүлимбетов. – «Әҳмийетли 40 күнлик» даўамында белгиленген жерлерге 20 мың түптен аслам терек нәллерин отырғызыўды мақсет еткенбиз.
Сондай-ақ, улыўма миллий жойбары шеңберинде даўам етип атырған илажлар барлық факультетлер көлеминде ҳәр күни әмелге асырылып атырған болып, институт жәмәәти ҳәм студентлери ана тәбиятымыздың гүллеп-жаснаўы, қоршаған орталықтың абаданласыўына мүнәсип үлеслерин қоспақта.
Ислам Матеков,
Karinform.uz.
Автордың түсирген фотолары.
Сайтымыздың телеграмдағы каналына ағза болың: https://t.me/karinformuz
