Усы жылдың 19-20-21-ноябрь күнлери Ташкент ўәлаятының Алмалық қаласындағы «Металлург» спорт комплексинде волейбол бойынша Өзбекстан суперкубогы жарыслары болып өтеди.
Ҳаял-қызлар арасында өткерилетуғын жарыста бир неше мәрте Өзбекстан чемпионы ҳәм суперкубогы жеңимпазы болған Әжинияз атындағы Нөкис мәмлекетлик педагогикалық институтының «НМПИ» қызлар сайланды командасы әзелий қарсыласы болған Өзбекстан мәмлекетлик дене тәрбия ҳәм спорт университетиниң «СКУФ» командасына қарсы ойнайды.
Мәлим болыўынша, ойынлар еки жеңиске шекем даўам етеди. Егер дәслепки еки ойында Өзбекстан суперкубогы қарама-қарсылығының жеңимпазы анықланса, соңғы үшинши ойын өткерилмейди ҳәм жарыс тоқтатылады.
Егер дәслепки еки ойыннан соң күшлер тең келип қалса, суперкубок жеңимпазы соңғы үшинши күнги ойында анықланады. Усы суперкубок жарыслары менен Өзбекстанда быйылғы жылғы волейбол мәўсими өз жуўмағына жетеди.
Биз өз гезегинде «НМПИ» қызлар сайланды командасына суперкубок жарысларында әўмет тилеп қаламыз!
Ислам Матеков,
Karinform.uz.
Сайтымыздың телеграмдағы каналына ағза болың: https://t.me/karinformuz
