Өткен ҳәптеден дүньяда коронавирус пандемиясы менен байланыслы жағдай және қурамаласты. Буған Қубла Африка миллий жуқпалы кеселликлер институтының илимпазлары тәрепинен шийшемби күни В.1.1.529, яғный «omicron» штаммы анықланғаны себеп болды. Илимпазлардың айтыўынша, бул кеселлик АИЖСке шатылған адамда анықланып, мутацияға кирискен. Бул ҳаққында ӨзР Денсаўлықты сақлаў министрлиги мәлим етти.
Солай етип, жума күни Жәҳән денсаўлықты сақлаў шөлкеми айрықша жыйналыс шақырды. Бул жерде дүньяның жетекши илимпаз ҳәм қәнигелери тәрепинен жаңа штамм додаланды.
Дәслепки шешимлерге қарағанда, «omicron» оғада көп мутацияларды өз ишине алған ҳәм «дельта» штаммынан да жуқпалы есапланады. Ең жаманы, жаңа версия әллеқашан Африкадан басқа континентлерге тарқалып үлгерген.
Мәселен, өткен ҳәптениң ақырында Бельгия, Германия, Италия, Нидерландия, Уллы Британия, Чехия, Дания сыяқлы бирнеше мәмлекетлерде «omicron» штаммы менен наўқасланыў жағдайлары анықланды.
Сол себепли Россия, Германия, Израиль, Уллы Британия, Сингапур, Бахрейн, Италия, Нидерландия, Марокко, Франция, Чехия, Австрия, Малайзия, Саудия Арабстаны, Швейцария, Түркия, Канада, АҚШ, БАӘ, Мыср, Аргентина, Бразилия, Австралия сыяқлы мәмлекетлер барыс-келисте, аэропортларда ҳәр қыйлы шеклеўлер енгизди.
Мәселен, Уллы Британияда қәлеген сырт мәмлекеттен келген адам ПШР (полимераз шынжырлы реакция) тестин тапсырыў ҳәм унамсыз нәтийже алынбағанша өзин изоляциялаўы шәрт. Сондай-ақ, ҳүкимет жәмийетлик орынларда және нықап тағыўды енгизди. Бул жерде вакцина алғаннан берли 6 айдан көп ўақыт өткен ҳәм 40 жастан өткен халық ўәкиллерине қайта шаншыў усыныс етилиўи де айтылмақта.
Россия болса кешеден баслап Африканың бирнеше мәмлекетлери, сондай-ақ, Гонконгтан сырт еллилердиң өз аймағына кириўин шекледи. Израиль ҳүкимети өз шегараларын 14 күнге жаўып қойыўын жәриялаған болса, Кувейт 9 мәмлекет пенен авиарейслерди тоқтатты. Марокко да олардың қатарына қосылды.
Швейцария жаңа штамм себепли Чехия, Уллы Бриятания, Нидерландия ҳәм Малавиден келген саяхатшыларға шеклеўлер енгизди.
Япония болса 30-ноябрьден мәмлекетти сырт еллилер ушын жаўатуғынлығын мәлим еткен.
Ислам Матеков,
Karinform.uz.
Сайтымыздың телеграмдағы каналына ағза болың: https://t.me/karinformuz
