Жол-патруль хызмети инспекторлары транспорт басқарыўшысын спиртли ишимлик тәсиринде деп гүманланған ўақытта жаңа үлгидеги «Алкостоп-8000S» маркалы алкотестер қурылмасы жәрдеминде тексериледи. Бул ҳаққында ӨзР ЖҲҚББ хабар берди.
Қурылма актив ҳәм пассив режимде қолланылады. Пассив режимде транспорт басқарыўшысы тоқтатылған ўақытта ЖПХ инспекторы алкотестердиң үплейтуғын тәрепин транспорт басқарыўшысына жақынластырады. Қурылма 5-10 сантиметрлик аралықта транспорт басқарыўшысының аўзынан шыққан этанол пуўлары арқалы оның спиртли ишимлик ишкени ямаса ишпегенин анықлайды.
Еслетип өтемиз, алдын Нөкис қаласында ЖПХ инспекторы өз ара сәўбет ўақтында бас кийимин шешкен ҳәм транспорт басқарыўшысына үплеўин сорағаны сәўлеленген видео социаллық тармақларда жәрияланып, қызғын пикир-таласларды келтирип шығарған еди.
Ислам Матеков,
Karinform.uz.
Сайтымыздың телеграмдағы каналына ағза болың: https://t.me/karinformuz
