Усы жылдың 22-декабрь күни Бердақ атындағы Қарақалпақ мәмлекетлик университетиниң қарақалпақ филологиясы ҳәм журналистика факультети 1-курс студентлери менен Өзбекстан Миллий мәлимлеме агентлигиниң Қарақалпақстан бойынша фотохабаршысы Мақсет Ҳабибуллаев пенен ушырасыў болып өтти. Ушырасыўдан мақсет студент жаслардың журналистикаға, соның ишинде фотожурналистикаға болған қызығыўшылығын арттырыў, тараўдың өзине тән қыйыншылықлары ҳәм фотожурналистке қойылатуғын талаплар менен таныстырыў еди. 10 жылға шамалас ўақыттан берли фотожурналистика тараўында ислеп киятырған журналист пенен ушырасыў қызықлы ҳәм мазмунлы өтти. Студентлер өзлериниң қызықтырған сораўларына жуўаплар алып, Мақсет Ҳабибуллаевтың өмири ҳәм кәсиплик хызмети, фотожурналистиканың әмелияттағы көриниси туўралы көплеген мағлыўматларға ийе болды.
Перуза Яқупбаева
