Өзбекстан Сыртқы ислер министрлиги қоңсылас Қазақстандағы жағдайды турақлы түрде бақлап бармақта. Өзбекстанның Қазақстандағы дипломатиялық ўәкилханалары – Нур-Султандағы Елшиханасы, Алматы ҳәм Ақтаўдағы бас консуллықларында оператив штаблар шөлкемлестирилди, - деп хабар берди министрликтиң рәсмий ўәкили.
Хабарда жазылыўынша, қыйын жағдайда қалған пуқараларға айрықша итибар қаратылмақта. Студентлер менен байланыс орнатылды. Оларға зәрүр жәрдем көрсетиў жумыслары алып барылмақта. Нур-Султан қаласындағы аэропортта рейсин күтип атырған пуқаралар ыссы аўқат пенен тәмийинленди.
«Қазақстан аймағында болып турған Өзбекстан пуқаралары менен олардың ағайин-туўысқанлары ҳәм жақынлары арасында байланыс орнатыўға оператив түрде жәрдем көрсетилмекте.
Алматыдан Өзбекстанға қайтыўды қәлейтуғын пуқаралар дизими дүзилди. Олар «Uzbekistan Airways» компаниясының гезектеги рейслери арқалы Ўатанға қайтарылады. Ҳәзирги ўақытта Алматы аэропорты жабық қалмақта.
Өзбекстанның дипломатиялық ҳәм консуллық мәкемелери Қазақстан ҳуқық қорғаў уйымлары менен биргеликте орынларда турақлы байланыста болып турыпты. Ҳәзирги ўақытта Өзбекстан пуқараларының қолға алынғаны ҳаққында мағлыўмат жоқ», - деп жазылған рәсмий хабарда.
Хабарда Өзбекстан пуқаралары өзлерин қызықтырған сораўлар бойынша Өзбекстан Республикасының Нур-Султан (телефон: +7 771 020 36 73), Алматы (телефон: +7 777 950 44 33) ҳәм Ақтаў (телефон: +7 777 599 00 51) қалаларындағы дипломатиялық ўәкилханаларына мүрәжат етиўи мүмкинлиги қосымша етилген.
Ислам Матеков,
Karinform.uz.
Сайтымыздың телеграмдағы каналына ағза болың: https://t.me/karinformuz
