Нормативлик-ҳуқықый ҳүжжетлердиң жойбарларын додалаў порталында Жоқары ҳәм орта арнаўлы билимлендириў министрлиги тәрепинен ислеп шығылған Өзбекстан Республикасы Президентиниң «Жоқары, орта арнаўлы ҳәм профессионал билимлендириў мәкемелеринде тәлим алыўшылардың ҳәр жылғы қысқы демалысы ҳаққында»ғы пәрманының жойбары додалаўға қойылды.
Пәрман жойбарында атап өтилиўинше, Өзбекстан Республикасы профессионал билимлендириў мәкемелериниң оқыўшылары ҳәм жоқары оқыў орынлары студентлериниң ҳәр жылғы қысқы демалысын декабрь айының ақырғы он күнлиги ҳәм январь айының биринши он күнлиги аралығында етип белгилеў усыныс етилмекте.
Бунда билимлендириў тараўындағы мәмлекетлик басқарыў уйымлары шараятлардан келип шығып оқыўшы ҳәм студентлерге демалыс бериў мүддетин өзгертиў ҳуқықына ийе екенлиги қосымша етилген.
Пәрман жойбарында қысқы демалыс басланыўынан 10 күн алдын билетлердиң толық баҳасынан 50 процентлик шегирме төлеми тийкарында республика ишинде ҳәрекетленетуғын тез жүрер және жолаўшы (жоқары тезликте ҳәрекетленетуғын поездлар ҳәм барлық жолаўшы поездларының СВ, ВИП вагонлары буған кирмейди) поездларына, сондай-ақ, жергиликли авиарейслерге билетлер сатылыўы жолға қойылатуғынлығы атап өтилген.
Соның менен бирге, оқыўшы ҳәм студентлердиң жөнелисли қалалар аралық автобус қатнаўы арқалы ҳәрекетлениўи ушын да жеңилликли билетлер шығарыў механизми енгизиледи.
Сиз төмендеги көрсетилген силтеме арқалы усы пәрман жойбары бойынша өз пикир ҳәм усынысларыңызды жоллаўыңызға болады.
Силтеме: https://regulation.gov.uz/uz/d/56581
Ислам Матеков,
Karinform.uz.
Сайтымыздың телеграмдағы каналына ағза болың: https://t.me/karinformuz
