Бүгин Өзбекстан аймағына Кавказ аймақларынан ығал ҳаўа массасының кирип келиўи менен республика бойлап базы жерлерде жаўын, ал таўлы аймақларда қар жаўады, тек Ферғана ойпатлығы ўәлаятларында жаўын-шашын болыўы күтилмейди. Айырым жерлерде самалдың тезлиги 15-20 м/с қа шекем күшейиўи мүмкин. Ҳаўаның температурасы 13-18 градус жыллы дөгерегинде болады, - деп жазды «Өзгидромет».
Хабарда жазылыўынша, 1-март күни республика аймағының көпшилик бөлегинде жаўын жаўыўы даўам етеди, бирақ күшсиз болады. Қарақалпақстанда жаўын-шашын тоқтайды.
2-март күни ығал ҳаўа массасы шығыс тәрепке жылысады, тек Ташкент ўәлаяты ҳәм Ферғана ойпатлығы ўәлаятларында түнде ҳәм азанда жаўын жаўыўы күтиледи. Усы күни күндиз ҳаўа алағат бултлы болып, температура 12-17 градус жыллыдан жоқары болмайды.
Ҳәптениң екинши ярымынан Өзбекстан аймағына Иран аймақларынан оғада жыллы ҳаўа кирип келиўи күтилмекте, буның нәтийжесинде жаўын-шашынларсыз оғада жыллы ҳаўа райы болады. Ҳаўаның температурасы күндизги ўақытта 18-23 градус жыллыға шекем, қублада ҳәм шөл аймақларында 25-27 градус жыллыға шекем көтериледи. Бул усы күнлердиң климатлық нормаларынан 10-12 градусқа жоқары болып есапланады.
Оғада жыллы ҳаўаның жедел түрде кирип келиўи 4-март күни самалдың 15-20 м/с қа шекем күшейиўине алып келиўи мүмкин.
Ислам Матеков,
Karinform.uz.
Сайтымыздың телеграмдағы каналына ағза болың: https://t.me/karinformuz
