Соңғы жыллары елимизде Ҳүрметли Президентимиздиң басшылығында социаллық жәрдемге мүтәж инсанларды ҳәр тәреплеме қоллап-қуўатлаў оларға әмелий жәрдемлер көрсетиў бағдарында бир қатар нәтийжели жумыслар әмелге асырылмақта.
Буның және бир айқын мысалын бүгин Хожели районындағы барлық қолайлы шараятларға ийе болған «Социаллық қалаша»ның пайдаланыўға тапсырылыўында көриўимиз мүмкин, - деп жазды ҚР Жоқарғы Кеңеси мәлимлеме хызмети.
Қалашаның ашылыў салтанатына Қарақалпақстан Республикасы Жоқарғы Кеңесиниң Баслығы Мурат Камалов қатнасып, жыйналғанларды «Социаллық қалаша»ның ашылыўы менен қызғын қутлықлады.
Пайдаланыўға тапсырылып атырған имаратта өткен қысқа ўақыт ишинде 8 миллиард сумлық реконструкция жумыслары алып барылып, қалашада текстиль оқыў орайы, балалар бақшасы, ыссыхана, китапхана, дәрихана, компьютер орайы, спорт залы, шаштәрезхана, устахана ҳәм басқа да бир қатар хызмет көрсетиў шақапшалары жумыс алып бармақта.
Бул қалашада 124 квартира ийелери ушын барлық қолайлы шараятлар жаратылған.
Еслетип өтемиз, Президент Ш.Мирзиёев 2017-жыл 20-21-январь күнлери Қарақалпақстанға сапары даўамында усы орында жайласқан «Ҳаяллар мүриўбет үйи»нде болып, бул жерде жаратылған шараятларды еле де жақсылаў бойынша көрсетпе ҳәм усыныслар берген еди. Елимиз басшысының усыныслары тийкарында «Ҳаяллар мүриўбет үйи» Нөкис қаласына көширилди. Бул мәнзил болса «Социаллық қалаша»ға айландырылды.
Қалашада тийкарынан, майыплығы болған, социаллық қорғаўға мүтәж ҳаял-қызлар, майыплығы болған жас өспирим перзентин тәрбиялап атырған шаңарақларға турақ жайлар берилген.
Бундағы тийкарғы мақсет, шаңарақларға тек ғана турақ жай берип қоймастан, олардың бәнтлигин тәмийинлеў болып табылады. Сонлықтан, бул жерде ҳәр бир шаңараққа өз алдына ыссыхана ажыратып берилген.
Соның менен бирге, тигиў цехы да болып, шаңарақ ағзаларының сол жерде де жумыс ислеў имканияты жаратылған. Буннан тысқары, кондитер өнимлерин писириў, шаштәрезлик ҳәм тағы басқа да курслар шөлкемлестирилген.
Сайтымыздың телеграмдағы каналына ағза болың: https://t.me/karinformuz
