Өзбекстан Республикасы Президентиниң 2022-жыл 28-январьдағы «2022-2026-жылларға мөлшерленген Жаңа Өзбекстанның Раўажланыў стратегиясы ҳаққында»ғы пәрманына муўапық, усы жылдың 1-апрель күнинен баслап мәмлекетлик емес мектепке шекемги билимлендириў шөлкемлери ҳәм мектеплерге перзентлерин жиберип атырған ата-аналардың айына 3 миллион сумға шекемги болған төлемлери дәрамат салығынан азат етиледи.
Соның менен бирге, усы пәрман тийкарында Қарақалпақстан Республикасы ҳәм Хорезм ўәлаятында 1-4-класс оқыўшылары бийпул аўқат (азанғы чай ҳалқас ямаса түслик) пенен тәмийинленеди.
Президенттиң 2022-жыл 7-марттағы «Шаңарақ ҳәм ҳаял-қызларды системалы қоллап-қуўатлаўға байланыслы жумысларды буннан былай да жеделлестириў илажлары ҳаққында»ғы пәрманына муўапық, бағыўшысынан айрылған ҳаял-қызлардың:
- перзентлери мәмлекетлик бақшаларға төленетуғын ата-аналар төлеминен азат етиледи;
- 3 жасқа толмаған перзентлери ушын мәмлекетлик емес бақшаларға бюджеттен субсидиялар ажыратылады.
Сондай-ақ, усы пәрман тийкарында толық қуўатлылық пенен жумыс ислемей атырған мәмлекетлик бақшаларға 2 жастан 3 жасқа шекемги балаларды пуллы хызмет көрсетиў тәризинде қабыллаўға рухсат бериледи.
Кешки сменада ҳаял-қызлар жумыс ислейтуғын кәрхана ҳәм шөлкемлер өзлериниң қасынан бақша шөлкемлестиргенде, олардағы тәрбияшылардың мийнет ҳақысы бюджеттен қаплап бериледи.
Ислам Матеков,
Karinform.uz.
Сайтымыздың телеграмдағы каналына ағза болың: https://t.me/karinformuz
