2022-жылдың 4-5-октябрь күнлери Нөкис қаласында БМШ Раўажланыў бағдарламасы Өзбекстан журналистлерин қайта таярлаў орайы менен биргеликте «Өзбекстанда энергия үнемлеўши аўыл үй-жайлары қурылысын раўажландырыўға көмеклесиў» қоспа проекти тийкарында журналистлер ҳәм блогерлер ушын «Гендер ҳәм имаратлардың нәтийжелилиги – жасыл экономикалық раўажланыўдын тийкары» темасында тренинг шөлкемлестирилди.
Тренинг 2 күн даўам етип, онда Қарақалпақстан ҳәм Хорезм аймақларынан журналист-блогерлер қатнасты. Тренингде электр-энергия, қурылыс, журналистика бағдарындағы жаңаланыўлар ҳаққында сораў-жуўаплар орын алды. Соның менен бирге, тәжирийбели қәнигелер тәрепинен ҳәр бир тараўға байланыслы аймақлық ҳәм дүнья жүзилик презентациялар, анализлер, интеллектуал ойынлар ҳәм қызықлы викториналар шөлкемлестирилди.
Тренингниң екинши күнинде Әмиўдәрья районындағы «Гүлзар» МПЖ да энергия үнемлеўши технологиялар тийкарында қурылған көп қабатлы үйлер менен танысыў мақсетинде медиатур шөлкемлестирилди.
Бийбижамал Реймбаева,
Шахноза-Бану Абдуллаева,
ⱩМУ қарақалпақ филологиясы ҳәм журналистика факультетиниң 2-курс студентлери
Karinform.uz
