Быйылғы жылы 1-курста оқып атырған, ижарада жасайтуғын студентлерге, бурынғысынан өзгеше тәризде, сентябрь ҳәм октябрь айлары ушын ижара төлеминиң 50 проценти – Ташкент қаласында базалық есаплаў муғдарының 1 есесине шекем (ҳәзирги ўақытта 300 мың сум), басқа аймақларда болса базалық есаплаў муғдарының 0,5 есесине шекем (ҳәзирги ўақытта 150 мың сум) ҳеш қандай ижара шәртнамасы талап етилместен төлеп бериледи. Ижара шәртнамасын усынған студентлерге ноябрь айынан төлемлер даўам еттириледи. Бул ҳаққында Жаслар ислери агентлиги директоры Алишер Саъдуллаев өз каналында мәлим етти.
Еслетип өтемиз, Өзбекстан Республикасы Министрлер Кабинетиниң 2021-жыл 24-сентябрьдеги «Ижара ҳуқықы тийкарында жасап атырған студентлер тәрепинен төленетуғын ижара төлемлерин қаплап бериў системасын енгизиў илажлары ҳаққында»ғы қарарына муўапық, 2021-жыл 1-майдан баслап жатақхана менен қамтып алынбаған ҳәм өзине, соның ишинде, ата-анасына (нызамлы ўәкиллерине) тийисли болмаған жайда ижара ҳуқықы тийкарында жасайтуғын мәмлекетлик жоқары оқыў орынлары студентлериниң 60 процентине олар тәрепинен төленетуғын айлық ижара төлеминиң 50 проценти Өзбекстан Республикасының Мәмлекетлик бюджети есабынан қаплап берилиўи белгиленген.
Усы имканияттан пайдаланыў ушын ижарада жасайтуғын студентлер өзи оқып атырған факультет деканының жаслар менен ислесиў бойынша орынбасары ямаса жоқары оқыў орнының студентлерди турақ жай менен тәмийинлеў жумысларын муўапықластырыў бөлимине мүрәжат етиўи мүмкин.
Ислам Матеков,
Karinform.uz.
