Бүгин, усы жылдың 2-декабрь сәнесинде Нөкис қаласы Ақ көл көшесинде Қарақалпақстан халық художниги, Қарақалпақстан Республикасына мийнети сиңген көркем-өнер ғайраткери, Бердақ атындағы мәмлекетлик сыйлығының лауреаты, Халықлар дослығы ордени ийеси, белгили художник Базарбай Серекеевтиң үй музейиниӊ ашылыў мәресими болып өтти.
Ашылыў мәресимине художниктиң шаңарақ ағзалары, жақынлары, мәденият хызметкерлери, көркем-өнер ықласбентлери, сондай-ақ, ҒХҚ ўәкиллери қатнасты. Художниктиң үй музейи ата жолын даўам етип атырған перзенти Бахтияр Серекеев, сондай-ақ оның жақынлары тәрепинен шөлкемлестирилген.
Илажда миллий фольклор атқарыўшыларының концерт бағдарламасы өткерилди. Үй музейинде художниктиң фотосүўретлери, дөретпелери, оның пайдаланған ҳәр қыйлы әсбап-үскенелери, жетискенликлерин көрсетип турыўшы медаль ҳәм орденлери өзгеше усыл менен безетилип жайластырылған.
Илаж даўамында мийманлар Базарбай Серекеевтиң салған сүўретлеринен, оның дөретпелеринен айрықша заўық алды.
Мағлыўмат ушын, 2022-жылдың 17-май күни пайтахтымыздағы Өзбекстан көркем өнер академиясы Қарақалпақстан бөлиминиң Көргизбелер сарайында Б.Серекеевтиң дөретпелеринен ибарат 80 жыллық юбилейине бағышланып оның шаңарақ ағзалары тәрепинен усынылған «Гедо» (грекше (Hedo) – заўық алыў, рәҳәтлениў, турмыстан мәни табыў) атамасындағы жеке көргизбеси, 22-ноябрь күни болса И.В.Савицкий атындағы Қарақалпақстан Республикасы мәмлекетлик көркем-өнер музейинде «Илҳам булақлары» атамасындағы көргизбеси шөлкемлестирилген еди.
Бүгинги үй музейиниң ашылыў салтанаты менен қутлықлап, Karinform.uz сайты редакциясы жәмәәти Базарбай Серекеевтиң өмири ҳәм дөретиўшилиги ҳаққында мағлыўматлар Қарақалпақ тилиндеги википедияға жайғастырылғанлығын хабарлаймыз.
Төменде ашылыў салтанатынан алынған фотосүўретлер менен танысыўыңыз мүмкин.
Шахноза-Бану Абдуллаева,
Фотосүўретлар авторы: Мехрибану Даулетмуратова
#KarinformWiki
