Қарақалпақстан баспасөзи 1924-жыллардан баслап қәлиплесе баслаған болса, бул жылларда дәслепки «Қызыл Қарақалпақстан», «Советская Каракалпакия» сыяқлы газеталар шыға баслады. Бул жылларда газеталарда хабарлар, жаңалықлар ҳәм жәмийетлик әҳмийетке ийе мақалалар фотосүўретлерсиз, текстлер менен берилип келинди. Дүньяда газетадағы ең дәслепки фотосүўрет 1880-жылы жәрияланған болса, Қарақалпақстанда фотосүўретлер баспасөз бетлеринде арадан 50 жылдан асламырақ ўақыт өткеннен соң, яғный, 1930-жыллардан баслап жәриялана баслады. «Советская Каракалпакия» газетасының 1934-жыл 2-декабрь күнги №256 (506) санының «Жақсы породалы атлар ушын» («За хорошего породистого коня») мақаласы фотосүўрет пенен берилген. Мақалада породалы атлардың көргизбеси өткерилгенлиги ҳаққында сөз етилген болып, фотосүўретте ат үстинде отырған шабандоз сүўретленген. Фотосүўреттиң авторы көрсетилмеген. Бул фотосүўрет бүгинги күнде Қарақалпақстан Республикасы архив иси басқармасында сақланып атырған ең ески жергиликли газета «Советская Каракалпакия»да жәрияланған дәслепки фотосүўрет болып табылады.
«Советская Каракалпакия» газетасының 1934-жыл 2-декабрьдеги саны
