Жасалма интеллект технологияларының раўажланыўы себепли көплеген кәсиплер жоқ болып кетеди. Бул мәселеге Microsoft компаниясының тийкарын салыўшы, миллиардер Билл Гейтс The Tonight Show шоусындағы шығып сөйлеўинде тоқтап өткен.
Гейтстиң пикиринше, пессимистлик болжаў ҳәм шамаларға қарамастан, үш кәсип ийелери – программистлер, энергетика ҳәм биология бойынша қәнигелер қәўетерленбесе де болады. Себеби олардың орнын жасалма интеллект ийелей алмайды.
IT қәнигелери жасалма интеллекттиң жумысын жақсылайды, биологлар илимий ашылыў ҳәм ойлап табылыўларға басшылық етеди. Энергетика системасы соншелли қурамалы, оны толық жасалма интеллекттиң басқарыўына тапсырыўға болмайды.
Соның менен бирге, миллиардер жасалма интеллект санааттан баслап аўыл хожалығына шекем – көплеген тараўларда адамларды мийнет базарынан қысып шығарыўына итибар қаратқан. Ол жасалма интеллект раўажланыўы изинен мийнет ҳәптеси 2-3 күнге шекем қысқарыўын да болжаған.
Соңғы ўақытлары ChatGPT сыяқлы жасалма интеллект бағдарламаларының жедел раўажланыўы артынан көплеген тараўларда жумыс орынларының қысқарыўы, технологиялар инсанлардың орнын ийелейтуғынлығы ҳаққында қызғын додалаўлар болып өтпекте.
