Игуаин Чемпионлар лигасы тарийхындағы ең тез урылған дубль ийесине айланды

Футбол бойынша Европа Чемпионалар лигасы тарийхында ең тез урылған дубль бойынша рекорд жаңаланды. 13-февраль күни түнде болып өткен «Ювентус» ҳәм «Тоттенхэм» клублары арасындағы ойында Гонсало Игуаин 8 минут 7 секунд ишинде 2 гол урыўға (дубльге) еристи. Турин клубының аргентиналы ойыншысы дәслепки голды 2-минутта қарсыласлары дәрўазасына жоллаған болса, 9-минутта пенальтиди сәтли атқарып, өз рекордын орнатты.
Буған шекемги ең тез урылған дубль рекорды аргентиналы Хулио Рикардо Крусқа тийисли болып, ол 2006-жылы «Интер» қурамында ойнап, Москваның «Спартак» командасының дәрўазасына 8 минут 30 секунд ишинде 2 гол урыўға ерискен еди.
Гонсало Игуаин рекордқа ерискен ойында «Ювентус» «Тоттенхэм» менен тең нәтийже көрсетти – 2:2. Игуаинниң ойында хэт-трикке ерисиў имканияты да болды. Биринши таймның соңында оның қәте тепкен пенальтиси «Юве» ықласбентлерин бираз ренжитти.
Англияның «Тоттенхэм» клубы қурамында Харри Кейн ҳәм Кристиан Эриксен Игуаинниң дублине жуўап қайтарды. Жуўап ойыны усы жылдың 8-март сәнесинде болып өтеди.
Сондай-ақ, 13-февраль күни Чемпионлар лигасы шеңберинде «Базель» ҳәм «Манчестер Сити» клублары арасында да дәслепки ойын өткерилди. Онда англиялылар қарсыласлары дәрўазасына жуўапсыз 4 гол жоллап, кейинги басқышқа шығыў ушын жақсы нәтийжеге ерисе алды. Ойында Илкай Гюндаган дубльге ерискен болса, Серхио Агуэро ҳәм Бернарду Силва биреўден гол урыўға еристи. Бул командалар арасындағы жуўап ойыны да 8-март күни өткериледи.
Мағлыўмат ушын, бүгин, яғный 14-февраль күни де Чемпионлар лигасының 1/8 финалында еки ойын өткериледи. Онда «Порту» өз үйинде «Ливерпуль»ди қабылласа, «ПСЖ» Мадридте «Реал» мийманы болады.

Ислам Матеков.