WikiLeaks Орайлық Разведка басқармасының «Пандемия» вирусы ҳаққында мағлыўмат берди

Жасырын мағлыўматларды әшкаралаўға қәнигелескен WikiLeaks шөлкеми АҚШ Орайлық Разведка басқармасының жасырын жойбары «Пандемия» ҳаққындағы мағлыўматларды жәриялады. «Пандемия»дан гөзленген тийкарғы мақсет, жеке компьютер пайдаланыўшыларын бақлаў болған.
Windows бағдарламалық тәмийинатындағы айрым файллар троян бағдарламасы менен алмастырылған, пайдаланыўшының өзи болса вирусты жергиликли тармақ арқалы тарқатқан. Экспертлердиң айтыўынша, ол техникалық жақтан оншелли жетик емес, Windows файлларын қай формада алмастырыўды түсиниўге көмеклесетуғын техникалық түсиндирмелер жоқ.
WikiLeaks 7-марттан баслап Орайлық Разведка басқармасы тәрепинен қолланып келинген киберразведкалық усыллар ҳаққында көплеген мағлыўматларды жәриялай баслады. Бул мағлыўматлар тийкарында соны айтыў мүмкин, басқарма мобиль телефонлар арқалы бақлаў имканиятын беретуғын бағдарламалар, сондай-ақ, пүткил дүньядағы смартфонларға жалғаныў мүмкиншилигин беретуғын технологиялардан пайдаланған.