Жабық есиклер күнлери ямаса тек комиссия ушын ашылатуғын есиклер

Нөкис қаласындағы көпшилик мәмлекетлик шөлкемлер, оқыў орынларының дерлик барлығының тийкарғы алдыңғы есиклери жаўық болады. Ал, ишке кириў ушын қосымша имараттың қаптал тәрепиндеги бир есиги ашық турады. Бул тийкарғы үлкен есиклер «кирлеп» қалмаўы ушын ойлап табылған болса итимал. Бирақ, усы есиклер комиссия, тексериўшилер келетуғын күни ашық болатуғыны анық. Ҳәттеки, тийкарғы алдыңғы есиклери ашық турғанлығынан сол орынға комиссия келгенлигин билиўге болады. Бул тек Нөкис қаласына ғана тән емес. Бул жағдайды дерлик барлық районларда ушыратыў мүмкин. Имаратлардың қосымша есиги айрықша жағдайлар жүз бергенде пайдаланыў ушын салынады. Ал, имаратты қурған ўақытта оның тийкарғы алдыңғы есиклери, кирер жери имаратка кириўшилер, мийманлар ушын арнайы түрде сулыўлап, ишке кирген адамның зейнин ашатуғындай етип салыў нийет етиледи. Имаратқа келген адам дәслеп оның есиклерине қарап баҳа береди. Сонлықтан, тийкарғы есиклерди ашып, хызметшилер ҳәм мийманларды ашық жүзлилик пенен күтип алайық!

Сахибжамал Есемуратова