Быйыл жаслар фестивалы шеңберинде гала-концерт бола ма? Анықлық киргизилди

Усы жылдың 17-март күни пайтахтымыздағы Жаслар орайында өткерилген Жаслар пресс клубының 4-сессиясында KarInform.uz сайтының редакторы Ислам Матековтың «Быйылғы жылы жаслар фестивалы бола ма? Гала-концерт те болып өтиўи режелестирилген бе?» деген сораўына Өзбекстан жаслар аўқамы Қарақалпақстан Республикалық Кеңеси баслығының орынбасары Б.Аралбаева төмендегише жуўап берди:




- Быйылғы жылы жаслар фестивалы «Жаслар – келешек қурыўшылары» сүрени астында барлық билимлендириў мәкемелеринде, 3 бағдарда - «Жас қосық атқарыўшылары», «Жаслар музыкалы ансамбльлери ҳәм оркестрлери» ҳәм «Студентлер театр-студиялары» бағдарлары бойынша өткериледи. Бирақ, өткен жыллардағы сыяқлы пайтахтымыздың орайлық «Туран» стадионында фестивалдың гала-концерти болмайды. Деген менен, жоқарыдағы 3 бағдар бойынша фестивал қатнасыўшылары халық алдында концерт формасында өз қәбилетлерин көрсетип бериўи керек болады, - деп айтып өтти.
Еслетип өтемиз, өткен жылдағы «Биз – уллы журт перзентлеримиз!» ураны астында өткерилген жаслар фестивалының гала-концерти 19-май сәнесинде «Туран» стадионында болып өткен еди.

Сайтымыздың телеграмдағы каналына ағза болың: https://t.me/karinformuz

Ислам Матеков.