Мессидиң жаңа шәртнамасы белгили болды

Каталонияның «Барселона» клубының ҳүжимшиси Лионель Месси өз клубы менен шәртнаманы узайтты. Бул ҳаққында клубтың рәсмий сайтына тийкарланып, Tribuna хабарлады.
Мағлыўматларға қарағанда, аргентиналы футболшы дем алыстан қайтқаннан соң клуб пенен 2021-жылдың 30-июнына шекем арналған шәртнамаға қол қояды.
Алдынырақ тарқалған мағлыўматларға қарағанда, Мессидиң жаңа шәртнамасында Месси ушын төленетуғын пул муғдары 300 миллион евроға шекем көбейтилгени мәлим етилген еди.
30 жаслы футболшы «Барселона» қурамында 2001-жылдан берли болып, 2004-жылы 17 жасында тийкарғы қурамда дебют ойынын өткерген. Ол усы ўақытқа шекем каталониялылар командасы қурамында 583 ойында майданға түскен ҳәм 507 гол урған.
Ол усы ўақыт даўамында 8 мәрте Испания чемпионы, 5 мәрте Испания Кубоги ийеси, 6 мәрте Испания Суперкубогиниң ийеси, 4 мәрте Чемпионлар лигасының жеңимпазы, 3 мәрте УЕФА Суперкубогиниң ийеси және де 3 мәрте клублар арасында өткерилетуғын жәҳән чемпионатының жеңимпазы болған.