Аўылда 650 ден аслам 7 жасқа толмаған балалар бар, бирақ, балалар бақшасы жоқ

Жақын күнлерде Олий Мажлис Нызамшылық палатасы депутаты Жолдасбай Абдижамилов Қарақалпақстан Республикасы Елликқала районында жайласқан «Гүлдирсин» АПЖ ҳәм Сахтиен қаласы аймағындағы халық пенен ушырасты.
Депутат аймақтағы 13-санлы ҳәм 43-санлы улыўма орта билим бериў мектебиндеги шараятлар менен танысты ҳәм 9-класс питкериўшилери менен олардың кәсипке болған қызығыўшылықлары туўралы сәўбетлести. Ушырасыўда 13-санлы мектептиң спорт майданшасында оқыўшылар ушын шараятлардың жетерли екенлиги, бирақ спорт газоны жетиспейтуғынлығы айтып өтилди.

Камил Шарипов сәўбет даўамында аўылда 650 ден аслам 7 жасқа толмаған балалардың болыўына қарамастан, балалар бақшасының жоқ екенлигин айтып өтти.
Депутат спорт майданшасының жанындағы «Гүлдирсин Нафосати» атлы тигиўшилик цехына кирип, ол жердеги шараятларды үйренди. Ол жерде 60 тан аслам адам жумыс пенен тәмийнленген. Ушырасыў даўамында депутаттың қоллап-қуўатлаўы менен коллеж питкериўшилери Шахло Хакимбаева ҳәм Махфира Азатовалар усы тигиўшилик цехына жумысқа жайластырылды.