Соңғы жыллары елимизде илимге ҳәм илимпазларға көп итибар қаратылмақта. Оларға илимди раўажландырыў, жаңалықлар жаратыў ҳәм мүнәсип шәкиртлерди таярлаў ушын имканиятлар жаратылған. Бундай имканиятлардан пайдаланыў ҳәм жаслардың илимге деген қызығыўшылығын арттырыў мақсетинде орынларда академик ҳәм профессорлар менен ушырасыўлар өткерилмекте. Усындай ушырасыўлардан бири 2018-жылдың 27-апрель сәнесинде Бердақ атындағы Қарақалпақ мәмлекетлик университетиниң мәденият сарайында болып өтти. Академик Шавкат Аюпов Абдуллаевич пенен ушырасыўды университет ректоры Ахмед Реймов алып барды.
Илим ҳәм техника тараўында биринши дәрежели мәмлекетлик сыйлықтың лауреаты, Өзбекстан Республикасы Илимлер Академиясы И.В.Романовский атындағы математика институты директоры Шавкат Аюпов пенен ушырасыўға университеттиң физика-математика факультети студент жаслары, магистрантлар, Бердақ атындағы Қарақалпақ мәмлекетлик университети академиялық лицейиниң оқыўшылары қатнасты.
Дәслеп профессор бүгинги күндеги илимге, илимпазларға деген итибар, олар ушын жаратылған имканиятлар, қоллап-қуўатлаўлар ҳаққында студент жасларға айтып берди. Оннан соң студентлер өзлерин қызықтырған сораўларына жуўаплар алды.
Математик алым, 1995-жылдан берли Өзбекстан Илимлер академиясы академиги, физика-математика илимлериниң докторы, профессор Шавкат Аюпов бүгинги күнге шекем Өзбекстан Илимлер академиясы математика институтында үлкен илимий хызметши, алгебра ҳәм анализ бөлими баслығы, директор орынбасары ҳәм директор, Өзбекстан Республикасы Жоқары аттестациялық комиссиясы баслығы лаўазымларында ислеген. Оның тийкарғы илимий мийнети функционал анализ ҳәм оның заманагөй тармақларынан бири есапланған операторлар алгебралары теориясы менен байланыслы.
Академик ҳәм профессорлар менен бундай ушырасыўлардың тез-тезден өткерилип турылыўы жасларды және де руўхландырады, олардың илимге деген қызығыўшылығын арттырыўға жәрдем беретуғыны сөзсиз.
Сахибжамал Есемуратова
