![](\"http://img.uz/d/2018/05/5afc6f405f23b.jpg\")
ҚМУдың мәденият сарайында шаңарақлы студент-қызлар арасында «Ибратлы келинлер» таңлаўы болып өтти.
Таңлаўға университет факультетлеринен ең белсенди студент-келинлер қатнасып, тийкарғы төрт шәрт бойынша сыннан өткерилди.
Таңлаў жуўмағына муўапық, Қарақалпақ филологиясы факультетиниң студенти 1-орынды, Техника факультетиниң студенти 2-орынды, ал шет тиллери факультетиниң студенти 3-орынды ийеледи. Жеңимпазлар диплом ҳәм қымбатбаҳалы саўғалар менен сыйлықланды, деп хабар берди университеттиң рәсмий сайты.
![](\"http://img.uz/d/2018/05/5afc6f608891b.jpg\")
Таңлаў елимизде әмелге асырылып атырған кең көлемли реформаларға жасларымыздың белсенди қатнасыўын тәмийинлеў, сондай-ақ, студент-қызлардың, соның ишинде жас шаңарақлы студент-қызлардың оқыўда ҳәм жәмийетлик жумысларда белсендилигин арттырыў, оларда өзиниң шаңарағына садықлық, пидайылық сезимлерин және де арттырыў, келешек турмысқа таярлаў, өзлери таңлаған қәнигеликлерине сүйиспеншилигин асырыў, миллий үрп-әдет дәстүрлеримизди, әдеп-икрамлылық, ийбелилик сыяқлы пазыйлетлерди бойына сиңдириў мақсетинде өткерилди.
![](\"http://img.uz/d/2018/05/5afc6f893d46f.jpg\")
Еслетип өтемиз, таңлаў Өзбекстан Республикасы Президентиниң 2018-жыл 2-февральдағы «Ҳаял-қызларды қоллап-қуўатлаў ҳәм шаңарақ институтын беккемлеў тараўындағы жумысларын түп-тийкарынан жетилистириў ис-илажлары ҳаққында»ғы 5325-санлы Пәрманында белгиленген ўазыйпаларды әмелге асырыў мақсетинде шөлкемлестирилди.
Сахибжамал Есемуратова
