Шымбай районындағы 43-санлы мектепте Рейимбай Сапаровтың туўылғанына 100 жыл толыў мүнәсибети менен район ҳәкимлигиниң қоллап-қуўатлаўы, мектеп жәмәәтиниң ҳәм туўған-туўысқанларының жәрдеми менен рәсмий музейиниң ашылыў салтанаты болып өтти, деп хабар берди Бекбай Сапаров фейсбук социаллық тармағында.
Музейдиң ашылыўына байланыслы өткерилген жыйналысты усы мектептиң муғаллими Ҳүрлиман Сержанова ашты ҳәм алып барды. Мектеп алдындағы Р.Сапаровтың бюстине гүллер қойылып, устазға тәжим етилди.
Устаздың өмири ҳәм хызметлери туўралы туўысқаны, журналист Бекбай Сапаров таярлаған баянаты менен қатнасты.
Буннан соң 2-санлы интернатты 1963-1964-оқыў жылында питкерген Р.Сапаровтың оқыўшысы Махаматдин Жарылқағанов, кәсиплеси Роза Длимова, ҳәм қызы Перуза Сапаровалар шығып сөйлеп, Р.Сапаровтың шөлкемлестириўшилик шеберлиги, инсаныйлық пазыйлетлери туўралы айтып өтти.
Музейде Р.Сапаровтың өмир жолы, хызметлери, ол туўралы жазылған китапшалар, газета-журналларда басылып шыққан сүўретли мақалалар орын алған.
Сахибжамал Есемуратова
